C2.1 Tsarin sarautun Hausawa: Marubuci Bello Hamisu Ida

 

Tsarin sarautun Hausawa

Ɗalibai su ba da bayanin sarautun Ƙasar Hausa da yadda ake naɗin sarauta a Ƙasar Hausa sannan su tantance sunayen sarautu da ayyukansu a Ƙasar Hausa. A yi amfani da rawani da alkyabba da algaita da hoton tambari da hoton doki wajen koyar da ɗalibai. Daga ƙarshen darasi, ɗalibai su amsa tambayoyi.

Ma’anar Sarauta

Sarauta wata hanya ce ta shugabantar jama’a ta hanyar samun iko da damar mulkar su da ɗora su bisa turba a ƙarƙashin jagorancin Sarki wanda ke riƙe da masarauta. sarauta wani tsari ne na tafiyar da harkokin mutane na yau da kullum.

Al’ummar Hausawa suna da tsarin sarautunsu na gargajiya don tafiyar da harkokin mulkin jama’a cikin sauƙi. Wannan tsari na sarautu da Hausawa suke amfani da shi wajen wakilci sun haɗa da: Sarki da Hakimi da Dagaci da Mai unguwa da kuma sauran jama’ar gari.

Yadda Ake Naɗin Sarauta A Ƙasar Hausa

Naɗin sarauta wata hanyace ta tabbatarwa da wanda aka zaɓa aka ɗora shi a kan mulki, aka kuma yarda da ba shi wata sarautar gargajiya a Ƙasar Hausa. A rana ta bikin naɗin sarauta, a kan yi biki. Za a gayyato manya da ƙananan masu riƙe da sarautun gargajiya, da kuma sauran jama’a zuwa wajen wannan biki don taya wanda za a naɗa murna.

Idan za a naɗa Sarkin a wata Masarauta, a kan yi ƙasaitaccen biki, a shirya hawa da sauran shagulgula masu ƙayatarwa, a shirya sukuwar dawakai da folo da makamantansu.

Ana yin girke-girke, a gayyato mawaƙa da makaɗa da maroƙa. Ana tanadar manyan riguna, na alfarma kamar alkyabba da takalmi da kuma rawani, wanda za ayi naɗi. A cikin fada ne za a zaunar da wanda za a naɗa a saka masa waɗannan riguna, a naɗa masa rawani. Da zarar an gama naɗin, sai a yi ta kaɗe-kaɗe da bushe-bushe ana buga tambura. Sai kuma da yammacin wannan rana da aka yi naɗin sarauta, mutane irin su Hakimai da Dagatai da masu Unguwanni, da kuma ‘Ya’yan Sarki, su yi ta zuwa suna kai wa sabon Sarki gaisuwa, tare da taya shi murna.

A wajen naɗa sarki, ‘yan majalisar sarki ne suke zaɓar mutane uku, daga cikin masu neman sarautar, sannan su miƙa wa gwamna, ya zaɓi ɗaya sai kuma a tabbatar da shi. Sarki ne yake zaɓar wanda yake so, domin ya naɗa shi hakimi. Dagaci kuwa, jama’ar gari ne suke zaɓa daga cikin masu takara. Wanda ya sami jama’a mafi yawa, shi ne ake naɗawa. Sai wanda ya gada ne yake yin sarautar Dagaci. Mai-unguwa dagaci ne yake naɗa shi, ko ya gada ko bai gada ba.

Tantance Sunayen Sarautu Da Ayyukansu A Ƙasar Hausa

        Ga yadda tsarin sarautun Hausawa ya ke da ayyukkansu:

Sarki: Shi ne shugaba kuma mai ba da umarni kowa yana ƙarƙashin ikonsa.

Hakimi: Shi ne mai kula da gunduma, wanda ƙauyukan Dagatai suke ƙarƙashinsa.

Dagaci: Shi ne mai kula da ƙauye guda ɗaya, daga cikin ƙauyukan da ke ƙarƙashin kulawar Hakimi.

Mai unguwa: Shi ne mai kula da unguwa guda ɗaya daga cikin unguwannin da ke ƙarƙashin garin dagaci cikin ƙauye guda ɗaya.

Sauran jama’a: Su ne al’ummar gari waɗanda ake mulka.

Aikin Aji

1.     Yi cikakken bayani a kan sarautun Ƙasar Hausa?

2.     Bayyana yadda ake naɗin sarauta a Ƙasar Hausa?

Kawo sunayen sarautu da ayyukansu a Ƙasar Hausa?