B.2. Adon Magana

Adon Magana

Ɗalibai su san ma’anar adon magana, su yi bayanin adon magana da misalan adon magana. A yi amfani da katuttuka ɗauke da kalmomin adon Magana da littafin ƙamus da jadawalin kalmomin adon magana. Daga ƙarshen darasi, ɗalibai su amsa tambayoyi.

 Ma’anar Adon Magana

Adon magana salo ne na yin magana taƙaitacciya kuma dunƙulalliya wadda ke ɗauke da ma’ana mai yawa da isar da saƙo cikin hikima. Ana yin amfani da adon Magana domun ayi nuni, gargaɗi, yabo, ko ƙarfafa guiwa. Adon magana ana yi wa kalmomi ado ne ta hanyar ƙara wasu kalmomin domin ayi nuni cikin hikima da fasaha.

Bayanin Adon Magana

Adon magana amfani ne da kalmomi inda ake yi masu ado domin a samu ingantaccinyar Hausa sannan ayi magana cikin harshen da hikima ta yadda mai sauraro zai fahimci zancen da ake yi, akan taƙaita kalmomi ne ayi amfani da wasu kalmomi domin ayi wa zancen ado da kwaskwarima. A kan yi Habaici, Zambo, Zaurance da sauransu a cikin zantuka da kuma rubutun Hausa ta hanyar amfani da adon magana.

 Misalin adon magana cikin zance:

1.      Sani yana yin kyauta ne da hannun dama ya karɓa da hannun haggu.

2.      Alhaji mai gani har hanji kenan, komai yana ankare da shi.

3.      Wannan ai ragon malam ne, ga mai ga arha.

4.      Ina zan samu takalman saye masu sauƙi kamar tuwon suna?

5.      Kan sa kamar an matse rama.

 Misalin Adon Magana

          Ga wasu daga cikin misalan adon magana:

1.          Idon zakara

2.          Hannun ruwa

3.          Ƙarkon kifi

4.          Dukan ciki

5.          Cin hanci

6.          Cin fuska

7.          Cin zarafi

8.          ci-ma-zaune

9.          Zaman ‘yan marina

10.      Kafircin mage

11.      Cinikin kifi a ruwa

12.      Shahadar ƙuda

13.      Farke laya

14.      Gadar zare

15.      Gashin zuma

16.      Harbin iska

17.      Kukan kura

Aikin Aji

1.          Yi bananin adon magana?

2.          Kawo misalan adon magana?

3.          Fito da ma’anar adon magana?