B1.1 Gajeren Rubutaccen Wasan Kwaikwayo: Marubuci Bello Hamisu Ida

 

Gajeren Rubutaccen Wasan Kwaikwayo

A darussan da su ka gabata, an fahimci abin da ake nufi da wasan ƙwaiƙwayo, an fahimci ma’ana da rabe-raben wasan ƙwaiƙwayo tare da misalin rubutaccen wasan ƙwaiƙwayo. A wannan darasi, ɗalibai su fahimci jigon wasan ƙwaiƙwayo, da yadda ake jera manya da ƙananan ‘Yan wasa, a jagoranci ɗalibai wajen yi masu bayanin wani wasan ƙwaiƙwayo na littafi, kamar wasan ƙwaiƙwayo na ‘Uwar gulma’ ko wasan ƙwaiƙwayo na ‘Marafa’. A karanta litattafan wasan ƙwaiƙayo tare da yi masu bayanin jigo da ‘Yan wasa tare da fiddo da darasin da ke cikin wasan. Ayi wa ɗalibai tambayoyi don a tabbatar da cewa sun fahimci darasi. Ayi amfani da litattafan wasan ƙwaiƙwayo da rediyo da talabijin da rikoda da kaset. 

 A jagoranci ɗalibai karanta wannan wasan ƙwaiƙwayo, a koya wa yara yadda za su yi wasan ƙwaiƙwayo:

 Jigon Wasan Ƙwaiƙwayo ‘Matsalarmu a Yau’

‘Yan Wasa

Jerin sunayen ‘yan wasa da halayensu:

Manyan ‘Yan Wasa

 

Ɗanliti:     Babban ɗan wasa ne, shi ne mijin Talatu kuma mahaifin     Sarai, Asabe da ‘Yar auta, yana da ƙoƙari sosai wajen tura     ‘ya’yansa makaranta.

Talatu:         Babbar ‘yar wasa ce, mace mai son kuɗi, kullum tana tura ‘ya’yanta talla domin su nemar mata kuɗi, bata son suna zuwa makaranta.

Yar auta:     Babbar ‘yar wasa ce, bata son zuwa makaranta, daga ƙarshe rayuwarta ta lalace sanadiyar yin talla.

Mai-rogo:    Babban ɗan wasa ne, mutum ne mugu mai ɓata tarbiyar yara.

Ƙananan ‘Yan Wasa

 

Sarai:                    Ƙaramar ‘yar wasa ce, ita ce babbar ɗiyar Malam Ɗanliti, tana son karatu, tana zuwa makaranta.

Asabe:                  Ƙaramar ‘yar wasa ce, tana son zuwa makaranta amma mahaifiyarta tana tursasa mata zuwa talla.

Hedimasta:            ƙaramin ɗan wasa ne, shi ne shugaban makaranta ne, wanda ke kula da ɗalibansa.

Malami na ɗaya:   Ƙaramin ɗan wasa ne, malami ne mai sa ido a kan rayuwar ɗalibansa.

Malami na biyu:    Ƙaramin ɗan wasa ne, Malami ne mai sa ido a kan rayuwar ɗalibansa.

Jiƙamshi:              Ƙaramin ɗa wasa ne, mutum ne mai sa ido ga rayuwar mutane.

Matsala:                ƙaramin ɗan wasa ne, yana saida rake, mutum ne wanda bai damu da abinda wasu ke aikatawa ba.

 

Taken Wasa: Matsalarmu a Yau

A wannan wasa mai taken ‘Matsalarmu a Yau’ mai fitowa uku wanda ya bayyana jigon aibun talla da rashin zuwa makaranta, wasan yana ɗauke da ‘yan wasa guda goma sha ɗaya. Za mu ga yadda wani magidanci kulum ya ke ƙoƙarin tura ‘ya’yansa mata makaranta, amma sai uwarsu ta tura su talla, inda daga ƙarshe aka lalace wa ‘yar autarta rayuwa.

 

Fitowa Ta Farko

(A Gidan Malam Ɗanliti)

 

Ya fito daga turakarsa, sannan ya yi gyaran murya, ya jirkice tare da saɓe babbar rigarsa gefe ɗaya, ya sanya hannu aljihu ya fiddo kuɗi.

 

Ɗanliti        Sarai, asabe, ‘yarauta (ya kwalla masu kira) ku fito ku tafi makaranta mana, har ƙarshe bakwai da minti biyar ta yi, bana so kuna lattin zuwa makaranta.

Talatu          (Tana daga cikin ɗakinta ɗaga murya) ai kam, Malam da har na ce yau kar su je makaranta, ina so in aike su wani waje ne.

Ɗanliti        Wace irin magana ce wannan marar amfani, kin taɓa ganin inda yaro ya yi rayuwa ba karatu? To bana son irin wannan magana marar amfani.

Ɗanliti        (ya ɗan yi shiru yana shaƙar iska) ki fito.

Sarai            (Ita ce babbar ‘yarsu, ta fito cikin sauri, riƙe da jakar makarantar ta) baba ni har na gama shiryawa.

Ɗanliti        (Ya fiddo kuɗi, ya miƙa mata) ga kuɗin tara, ki tambayi malamanku ko akwai litattafan da ku ke buƙata a saya na karatu.

Sarai            To baba, mun gode (ta saɓa Jakarta, ta yi gaba).

Ɗanliti        Ku kuwa in kun gama duminiyar sai ku bi sahunta, ku Tabbata kun je makaranta da wuri. (Ya shiru takalmansa ya yi gaba)

Talatu          (tana guna-gunai) Muguwar yarinyar can mai farar ƙafa, yanzu ta sa dole sai anyi jibgaron tire ɗaya.

 

Asabe da ‘Yar auta suka fito daga ƙuryar ɗaki, sanye da rigar kanti da atamfa, sun saɓa wani yamaɗiɗin gyale, sannan suka nufi inda aka aje tiren tallar kayan miya.

 

Asabe                   Inna ina dawowa zan tafi makaranta.

Talatu          Wannan kuma ke ta shafa, ni kam abinda ya dame ni, ki tabbata kin sayar da komai. (ta ɗanyi shiru) ai wannan talla da malam ya raina da ita ce zan cika wa kowace daga cikinku ɗakinta da kayan alatu, amma banda waccan mai farar ƙafar.

Talatu          Wa ya ce masa akwai wata moriya a karatun boko? kullum zai addabi rayuwarmu da zuwa makaranta.

‘Yar auta     (Ta fito bayan ga gama yin ja gira da jambaki, ta yafa gyale sannan ta ɗauki tire) Inna su ne ke rufa wa baba baya a kan karatun nan, ni ko saurararsa bana yi, yadda na tsani makarantar nan kamar mutuwata.

Talatu          Ka ji ɗiyar albarka, ai shi yasa ki ka fi su ƙashin arziƙi. Kayan ɗakinki sai ya fi na kowa.

 

Dukkansu suka ɗauki tire, suka yi waje, suna bin gida-gida suna faɗin “A sai kayan miya” “za ku sayi kayan miya”.

 

 

Fitowa Ta Biyu

(A Cikin Makarantar Firamare)

Bayan an gama asambile, kowa ya shiga aji, malamai ana ta darussa, sai Hedimasta ya kira wasu amintattun malamansa waɗanda basu da darasi a lokacin.

Hedimasta             Duk da yake iyaye na bakin ƙoƙarinsu wajen tura yara makaranta, amma sai a samu yara da yawa suna laɓewa in an turo su makaranta. Don haka ina so ni da ku mu bi lungu-lungu da saƙo don kamo ɗaliban da suke ƙin zuwa makaranta.

Malami na ɗaya    Ranka shi daɗe, rannan ma na ga ɗiyar gidan malam Ɗanliti tana talla a lokacin makaranta, kasan ni ke kira masu rigista, sau da yawa bata zuwa makaranta.

Malami na biyu     Yana bakin ƙoƙarinsu, amma ba su samu uwa ta gari ba, ita ce ke ɗora masu talla.

Hedimasta             In kun gan su yau sai ku tafo da su makaranta.

 

Dukkansu suka warwatsu cikin gari, don kamen yaran da basu zuwa makaranta.

 

Fitowa Da Uku

(Cikin Unguwa)

‘Yar auta               A sai kayan miya: citta, karamfani, albasa, tarugu, busasshen tattasai, busashen tumatus, daddawa, kuka, magi da manja.

 

Mai-rogo              (Yana zaune bisa dakalin ƙofar gidansa, ya kanne idonsa ɗaya wanda yake gani dashi, yana kallon ‘Yar auta tana talla) shin waccan ba ɗiyar gidan Malam Ɗanliti ba ce?

Matsala                 (Ya ƙura ido sosai) eh, ita ce, ai ita kullum bata zuwa makaranta, sai talla.

 

          Ya tashi daga saman dakalin, sannan ya nufi wajen sana’arsa inda yake saida rake, bayan ya ɗan fere wani raken sai ya gutsura sannan ya ci gaba da ɓantala yana sha, hankalinsa ya tafi. Shi kuwa Mai-rogo hankalinsa na wajen ‘Yarauta, lokacin da ta ƙaraso sai ya ce ta shiga gidansa ta kai cefane, tana shiga sai ya bi sawunta.               

 

Jiƙamshi               (Yana zaune can daga gefe yana shan inuwa, ya ga duk abinda ya faru tsakanin Mai-rogo da ‘Yar auta) Kai Mai-rogo bai kyauta ba, to sai na kai gulmarsa wajen Hedimasta, duk abin da yake aikatawa a cikin garin nan ina sane da shi.

Malami na ɗaya    (Ya karyo kwana bisa kekensa, yana tafe yana rarraba idanuwa, daidai lokacin da ya kawo wajen Jiƙamshi sai ya tsaya sannan ya aje kekensa) Sannunka da hutawa, ko ka ga wasu ɗalibai nan suna shawagi? Mun fito ran gadi ne domin tafiya da ɗalibai marar sa zuwa makaranta.

Jiƙamshi               Yanzu kuwa na ke shirin tashi in kai ƙarar Mai-rogo wajen Hedimasta, kullum sai ya tare ‘yar gidan Malam Ɗanliti a cikin gidansa in matarsa bata nan.

Malami na ɗaya    (Ya zazzaro ido) kar dai in ce ‘Yar auta?

Jiƙamshi:               Ina tsammani ita ce.

Malami na ɗaya    Yanzu ina Mai-rogo?

Jiƙamshi               Ya shiga cikin gidansa, (ya xan yi qasa-qasa da murya sannan) itama ‘yar autar tana cikin gidan.

 

Kafin Malam ya shiga gidan Mai-rogo sai ya tafi caji ofis da ke kusa da su, ya tafo da ‘yansanda guda uku, aka zo aka kama Mai-rogo hannu dumu-dumu, sannan aka tafi da shi. Bayan da aka gama tuhumarsa, aka kai shi kotu sannan alƙali ya yanke masa hukunci. Ita kuwa Talatu ta yi nadama, daga ranar bata ƙara ɗaurawa ‘ya’yanta talla ba.

Abin da Wasan Ƙwaiƙwayon Yake Koyarwa

·        A guji yin talla marar amfani.

·        A bar fifita neman kuɗi bisa neman ilimi.

·        Ɗalibai a guji guduwa daga makaranta.

·        Idan iyaye sun tura ku makaranta, a tafi.

·        Ɗalibai a guji shiga gida idan wani ya kira ku.

·        Kar a laɓe ko a tafi gidan ƙawaye ko wankan tafki ko yawo marar dalili.

 

Tambayoyi

1.     Mene ne jigon wannan labari mai suna ‘Matsalarmu a Yau’?

2.     Lissafa sunayen ‘yan wasa guda biyar a cikin labarin?

3.     Ware manyan ‘yan wasa.

4.     Ware ƙananan ‘yan wasa.

5.     Cikin layi biyu, bayyana halin Malam Ɗanliti.

6.     Cikin layi biyu, bayyana halin Talatu.

7.     Cikin layi biyu, bayyana halin Jiƙamshi.

 

8.