Sauya fasalin Naira: Buhari ya kudiri aniyar tauye dimokaradiyya – Ganduje

KANO, NAJERIYA - Gwamnan jihar Kano, Abdullahi Umar Ganduje ya yi zargin cewa sake fasalin Naira da gwamnatin Muhammadu Buhari ta yi manufa ce da aka shata da kudirin tauye dimokaradiyya. Ganduje ya bayyana haka ne a wata  ganawa da ya yi da kungiyar tsaffin ‘yan majalisar dokokin kasar daga yankin arewa maso yamma, wadanda suka ziyarce shi don bayyana masa aniyar goyon bayansu ga dan takaran shugaban kasar APC, Asiwaju Bola Ahmed Tinubu.

Zargin na Ganduje ya zo ne a daidai lokacin da ‘yan Najeriya suke shan radadi sakamakon karancin takardun kudaden Naira 200, 500 da 1000. A jawabinsa, shugaba Buhari ya ce sake fasalin Naira ya samo asali ne daga  kudirinsa na tada komadar tattaalin arzikin kasar, rage hauhawar farashin kayayyaki da daakile halasta kudaden haram.