Kasar Iran Ta Rataye Majid Reza Rahnavard Mai Rajin Ƙin Jinin Gwamnatin

Daga: Arewa News

ABUJA, NAJERIYA — Ƙasar Iran ta Rataye wannan mai rajin ƙin jinin gwamnatin mai suna Majid Reza Rahnavard bayan yanke masa hukuncin kisa ta hanyar rataya. Bayan shi akwai wasu masu laifuffuka da aka yiwa hukuncin kisa ta hanyar rataya, wani ɗan ƙasar da shima aka zarga da sa hannu a mutuwar wasu jami’an tsaro lokacin gudanar da wata zanga-zanga da aka yi a watan Nuwamba.

Majid dai ya daɗe a tsare yana jiran hukunci, saidai an yanke masa hukunci ne bayan da kotu ta tabbatar da cewa yanad a hannu a kisan wasu jami’ai biyu dake rundunar Basij, wannan runduna ta yi ƙarfin suna wajen shiryawa da kitsa yadda za a kwantar da tarzoma a cikin ƙasar.

Ba shi kaɗai aka yanke wa irin wannan hukuncin ba, ko a makon da ya gabata, wata kotu dake Tehran ta yanke hukunci a kan wani mai suna Mohsen Shekari wanda aka tuhuma da laifin taimakawa da kuma jigata wasu jami’an tsaro a lokacin da suke ƙoƙarin kwantar da tarzoma tsaka da lokacin da ake zanga-zangar.

Iran ta fada cikin rudani, tun bayan mutuwar matashiya Mahsa Amini da ake zargin ta mutu saboda azabar da jami'an Hisbah suka gallaza mata bisa laifin kin mutunta dokar sanya hijabi.