Labarin: Babbar Yarinya Na Usman Ango

Kungiyar Marubutan Jihar Katsina (KMK)

An karanta wannan labari tare da yin bitarsa wajen Reading Session da Kungiyar Marubutan Jihar Katsina KMK ta gudanar a ranar 12 ga watan Febrairu, shekara ta 2022.

***

Farkon Labarin

Sannu a hankali Hasiya ke hawa matakalar benayen dake ɓangaren ofisoshin Malamai, da za ka kalleta a lokacin, sai ka yi zaton jikin ta ba na jini da tsoka bane saboda tsabar karairayar da take yi.

Kai tsaye ofishi mai lamba sha takwas ta nufa, tun daga nesa ta ƙara canza takun tafiyarta, ba don komai ba, sai don kada ta samu matsala su haɗe da Malan Ɗan Furofesa a waje ta ƙi samun abinda ta zo nema cikin sauƙi. Da zuwan ta dai-dai ƙofar ofishin, sai ta saka hannu ta murɗa mabuɗin ƙofar tare da turawa, sannan ta shiga ciki tare da yin sallama da wata murya mai saurin jan hankalin ɗa namiji.

Ƙanshin turaren ta, da sautin muryar ta suka dakar masa zuciya, cikin sauri ya ɗauko da kan sa domin ganin ko wace ce. Hasiya ya gani cikin wata rikitacciyar shiga mai saurin tayar da zaune tsaye, yayin da bakin ta ke tauna cingam gwanin ban sha'awa da burgewa, wannan daliline yasa gaba ɗaya ta tafi da imanin sa, domin bai san lokacin da ya shagala ga kallon duk wata kusurwa ta jikin ta da ta bayyana ba.

Lokacin da Hasiya ta lura da irin kallon da Malam Ɗan Furofesa ke yi mata, sai ta sake kashe murya a karo na biyu sannan tace, "Malan ina kwana!"

Ajiyar zuciya yayi, tare da ajiye takardun dake hannun sa, sannan yace, "Lafiya lau Hasiya, Me ke tafe dake waje na da wannan sabon salon da ban saba ganin ki da shi ba?"

Murmushi Hasiya tayi, sannan ta zauna bisa doguwar kujerar dake cikin ofishin tana mai ɗora ƙafa ɗaya bisa ɗaya, sannan tace da Malan Ɗan Furofesa, "Malan jiya na je an duba man result ɗina a difatment, ko ina na ci amma ban ci kwas ɗin ka ba."

Gyara zama yayi ya cigaba da zuba mata ido, sannan yace da ita, "Allah ne ya ƙaddara maki haka, sai kiyi hakuri".

Hasiya na jin haka sai ta taɓe baki, sannan tace da shi a cikin muryar shagwaɓa, "Haba Malam! Dan Allah ka taimake ni mana, wallahi ba ni so ƙawaye na su fahimci na fadi kwas ɗin nan, a matsayina na babbar yarinya za ai mani dariya."

Murmushi ɗan Furofesa yayi da jin ta fadi haka, sai yace da ita, "Hasiya ai ba ki shirya cin kwas ɗin ba tun farko, da kin shirya da kin bi hanya ɗaya da waɗanda su ka ci kwas ɗin".

Hasiya na jin haka, sai ta ajiye jakar dake hannun ta, sannan ta mike tsaye tare juyawa a gaban malam Ɗan Furofesa, sannan tace, "Malan ka dube ni sama da ƙasa, ka san na ci sunan babbar yarinya, ban damu da duk abinda zai faru ya faru ba muddin za ka gyara man sakamako na ya koma mai kyau."

Murmushi yayi tare da riƙe baki, domin bai yi zaton zata fadi haka ba, amma sai yace da ita, "Hasiya koma meye fa kika ce !"

Girgiza kai Hasiya tayi tare da cewa, "Ƙwarai da gaske malam, ai ranar cikar buri rai ba a bakin komai yake ba!"

Jin haka yasa ya miƙe tsaye tare da zagayowa gaban teburin sa ya zauna, ya na mai cigaba da kallon ta, sannan ya ce, "Je kulle ƙofar shigowa da makulli ki dawo na ga idan za ki iya."

Cikin tafiyar ta mai tattare da jan hankali ta nufi ƙofar ta rufe, sannan ta dawo kusa da shi ta tsaya ta na mai cigaba da yi masa murmushi.

Ganin haka yasa malan Ɗan Furofesa ya ce da ita, "Kawo kunnen ki na faɗa ma ki wani abu da zai maki amfani muddin ki na so ki ci kwas ɗin."

Ba tare da wata gardama ba ta duƙo da kanta dai dai bakin sa, sanan yace da ita, "A dage shekara mai zuwa ayi karatu sosai domin samun damar cin kwas ɗin, amma ni ba ɗan iska bane kamar yadda kika yi tunani."

Jiki a sanyaya ta janye kunnen ta daga saitin bakin sa, har ta duɗi baki zata yi magana, sai ya ɗaga mata hannu, sannan yace, "Kada ki ce komai Hasiya, ki godewa Allah na taɓa son ki da Aure a cikin zuciyata, amma ba dan haka ba, wlh da sai na kai ki gaba an kore ki, saboda haka tun kafin na canza shawara ki fice mani daga ofis!"

Kamar Kazar da ƙwai ya fashe mawa a cikin ciki, haka Hasiya ta nufi hanyar fita daga cikin ofishin zuciyar ta cike da ƙunci da ɓacin rai, zuwa can sai wani ɓangare na zuciyar ta ya ce da ita, "Ke fa babbar yarinya ce, tunda ki na da kyawun da duk wani makwaɗaicin namiji zai yi mararin ki, kawai ki je gurin na sama da shi, ƙila ki dace burin ki ya cika".

Da wannan zancen zuci Hasiya tayi amfani, kai tsaye kuma ta nufi ofishin shugaban difatment ɗin su, bisa sa'a ta taradda ashe Kazagi ne, baya ganin banza bai ci ba.

A cikin abinda bai wuce awa ɗaya da rabi ba ta gamsar da shi, shi kuma ya gamsar da ita ta hanyar sawa a goge mata faɗuwa, sannan ta nufi gurin kwanan ɗaliban su na mata zuciya cike da farin ciki, har tana faɗawa zuciyar ta cewa, "Ai sai wani mutuncin ya zube ake ɗaukar wani!"

****

A haka Hasiya babbar yarinya ta kasance, muddin ta samu faduwa a wani kwas, to jikin ta shine abin bayarwa ga makwaɗaitan Malamai domin a gyara mata, hakan yasa girman kanta ya ƙaru, abokan karatun ta har kirari suke mata da cewa, "Babbar yarinya a wanka, babbar yarinya a GP!"

Lokacin da sakamakon jarabawar shekarar ƙarshe ya fito, sai Hasiya ta ganta da tarin faɗuwa, wanda a tunanin ta tuni malaman da ta gyaramawa sun daɗe da gyara mata su.

Cikin tashin hankali ta bi Malaman ta sanar da su, amma daga ba ta haƙuri babu abinda suke iya yi mata, wannan daliline yasa ba ta san lokacin da ta yanke jiki ta faɗi ƙasa sumammiya ba!

Lokacin da aka kaita Asibiti, sai likitoci suka tabbatar da tana ɗauke da cutar dake karya garkuwar jikin dan adam, watau ƙanjamau.

Baƙin ciki a wajen Babbar Yarinya ba a magana, ta na ji ta na gani ta hakura da makarantar ta koma gida ta zauna, tana mai nadamar biyewa dokin zuciya.