Jami’an Tsaron Sun Yi Namijin Ƙoƙari Wajen Daƙile Wani Hari A Ƙaramar Hukumar Batagarawa

Daga: Bello Hamisu Ida

KATSINA, NAJERIYA — A ranar 6 ga Maris, 2022 da misalin karfe 1930 na safe, an samu kiran gaggawa cewa, an ga ‘yan ta’adda masu yawa, ɗauke da bindigogi ƙirar AK 47 a kan babura, a wata mummunar manufa ta zuwa ƙauyen Barawa, dake ƙaramar hukumar Batagarawa ta Jihar. An tattaro tawagar ‘yan sanda da sojoji zuwa yankin, inda suka yi artabu da ‘yan bindigar sannan rundunar jami’an ta samun nasarar fatattakar su.

 

SP Gambo Isah, ANIPR, Jami'in Hukuncin Jama'a (PPRO), ya yi ƙarin bayani a wani dandali na sada zumunta na Popular Hausa News, inda ya ce,

Dabarun da jami’an tsaro suka nuna ya sa 'yan ta'addan suka tsorata sannan suka ari takalman kare suka arci cikin daji. An gano babura na ‘yan bindigar guda biyar. Daga bisani, DPO na Batagarawa ya kwato wasu babura na ‘yan fashin wanda suka ruga suka bar su a cikin dajin Barawa. Ko da yake ‘yan bindiga da dama sun tsere da harbin bindiga a jikinsu. An umurci jama'ar yankin da su kai rahoto ga jami'an tsaro mafi kusa in suka ga wani da mummunan rauni.

 

Kwamishinan ‘yan sandan Jihar Katsina, CP Idrisu Dauda Dabban, PSC, FDC, ya ga ƙoƙarin jami’an na daƙile ‘yan ta’adda. Ya kuma buƙaci jama’a da su ci gaba da bai wa jami’an tsaro haɗin kai wajen yaƙi da ta’addanci a jihar.

Garuruwan Katsina da Kaduna da Zamfara da Sokoto da Kebbi da Nija na ɗaya daga cikin garuruwan dake fama da hare-haren ɓarayin daji masu satar mutane don karɓar kuɗin fansa.