Najeriya Ce Ƙasa Ta Farko Dake Da Yara Miliyan 13 Maras Sa Zuwa Makaranta A Faɗin Duniya

 Daga: Hauwa'u Bello

ABUJA, NAJERIYA — Sama da yara miliyan goma sha uku 13 ne basa zuwa makaranta a ƙasar Najeriya, yaran sun haɗa da masu talla da masu yawo  bisa titi da waɗanda ke zaune gida ba kuma masu barace-barace. Majalisar ɗinkin duniya ce ta fitar da jadawalin ƙasashen da yara basa zuwa makaranta inda Najeriya ta zama a sahun farko kuma ƙasar ta tafi kowace ƙasa yawan yaran da basu zuwa makaranta.

Bayan fitar da rahoton daga Majalisar Ɗinkin Duniya, tuni dai ƙasar ta fara binciken yawan yaran da basu zuwa makaranta. Ya zuwa yanzu an fara ƙidayar yara maras sa zuwa makaranta a wasu jahohi dake cikin ƙasar.

Dr. Umar Buba Bindir ya bayyana yadda shugaban ƙasa ya nuna damuwarsa bayan ya samu rahoton MDD, ya ƙara da cewa,

“Wannan dalili ne ya sa aka zauna aka yi nazari sosai saboda muhimmancin da ilimi ke da shi a cikin al’umma”

Ya kuma ce,

“ba tare da bata lokaci ba shugaba Buhari ya bayar da umurnin a ɗauki matakin da ya da ce wajen magance wannan matsala, inda ya ce me zai hana a gina makarantu a kusa da inda yaran suke, ta yadda ba za su rinka shan wahala ba wajen zuwa makaranta”

Ya kuma ce,

''Akwai hukumar kididdiga ta ƙasa tana nan tana bin garuruwa da ƙauyuka don tantance yaran da ba su zuwa makaranta”

Matsalar rashin zuwa makaranta ga yara ba Arewacin Najeriya kaɗai ta yi ƙamari ba, babu inda ba a samun yara maras sa zuwa makaranta a faɗin ƙasar.

Ya kuma ce,

"Yanzu mun shirya nan da wata ɗaya zuwa wata biyu za a fara koya wa irin waɗannan yara abubuwa huɗu, wato turanci da lissafi da yadda za a zauna lafiya da kuma sana'a".

Ya ƙara da cewa,

''Sannan za mu rinƙa basu abinci sau uku kowa ce a rana, akwai malamai da aka samar waɗanda za su koyar da yaran”

Bayan matsalar rashin tsaro da tayi ƙamari a wasu jahohi dake ƙasar wanda ya taimaka sosai wajen hana zuwa yara makaranta akwai kuma talauci wanda wasu iyayen suka ɗauka cewa shi ne musababbin abinda ya hana su tura yaransu zuwa makaranta, kodayake hukumomi da gwamnati na iyakacin ƙoƙarinta wajen kawo zaman lafiya da kuma samar da ingantaccen ilimi a cikin ƙasar.

Wasu Labarai

1. 1. Bayan Rashin Lafiyar Maryam Yahaya Sai Kuma Me Ya Faru da Ita?
      
   2. Hisbah ta Kama wasu mutane da ake zargi da yin auren jinsi
      
   3. ASUU Ta Kaɗa Kuri’ar Fara Yajin Aikin Gargaɗi Na Wata Ɗaya