Hattara Da Bestie

Daga: Sister Iyami

Cikin zumuɗi da farin ciki na gama girke-girke da gyaran wurin da zan yi wa abin ƙaunata masauki tsab. Jiran isowarsa kawai nake yi, ni da kaina na gamsu cewar na yi kyau, bana buƙatar wani ya faɗa mani haka.

Kwatsam na tsinkayi wayata na ruri, cikin sauri na ɗauka duk a tunanina masoyina ne, sai da na amsa na ji muryar BESTIE na. Cikin isa da gadara ya ce mani,

“Ya iso ne ko har yanzu?”

Da sauri na ce,

“Yana hanya na sani, kila go-slow ya tsayar da shi”

Ya yi saurin katse ni ya ce,

“Kina da matsala wallahi, wannan gayen ya rainamu da yawa, saboda haka ko ya zo ba zai samu ganinki ba shi ne gaskiyar magana, ya yiwa kansa ki saurare ni ganinan zuwa”.

Cikin mintuna ƙalilan BESTIE ya ƙaraso gidanmu, kai tsaye ya wuce inda na shiryawa masoyina babban baƙona gara a matsayinsa na wanda zai yi zuwa na musamman a kan maganar aurenmu.

Ya fara kwasar garar da ba don shi nayi ba. Duk yadda nake jin sa a cikin zuciyata yau dai bai kyauta mani ba, ana haka masoyina ya kira wayata, BESTIE na shi ya amsa kiran ya ce cikin gadara,

“Ka na ji ko? yau dai ba zaka samu damar ganinta ba saboda ga alama baka respecting time”.

Ya tambaye ta cikin wayar ya ce,

“Kai kuma wanene haka da zan kira ta ka ɗaga kana bani wannan amsar?”

BESTIE cikin jin haushi ya kallleni tare da tambayarsa ya ce,

“Ashe bata baka labarina ba? kai tsaye ni ne BESTIE ta”

Ya faɗa ba tare da jiran jin amsar tambayarsa ba. Ya ƙara cewa,

“Sai na aminta da kai zata saurare ka har ka samu damar auranta. Don haka na gama magana yau dai ba zaka samu ganinta ba, ya katse kira”.

Hawayen takaici ya subuce zuwa kan fuskata, kasancewar girma da darajar mutumin ya wuce ayi masa haka.

BESTIE ya kalleni  wato ke har kin fara son sa za kiyi kuka don an hana shi zuwa? Daraja da mutunci nake son sa ma maki a wurin mutumin nan. Cike da baƙin ciki nake maganar,

“Wace irin daraja da mutunci kake nema mani saboda Allah ? Duk mutanen baya da ka korar mani suma daraja da mutunci kake nema mani, shi ya sa ka kore su ko ya ka ke nuif?”

Ya ce,

“Aw! ina ta ƙoƙari a kanki BESTIE  ashe ke haushina ki ke ji har kin kullace ni da korar masu son aurenki?”

Ya yi shiru sannan ta ce,

“Tsakani da Allah BESTIE wannan shi ne karo na biyar kana mani haka k..”

Ya yi saurin katse ni da cewa,

“Ki zaɓa ko ni ko shi”.

Cikin kaushin murya na ce,

“Ka ƙaddara mun rabu har abada in har wannan mutumin ya janye batun aurena, kuma Allah ya isa tsakanina da kai”.

BESTIE ME?