Daga Alkalamin Zaidu Ibrahim Barmo: Wani Gyara

An karanta wannan labari tare da yin bitarsa wajen Reading Session da Kungiyar Marubutan Jihar Katsina KMK ta gudanar a ranar 12 ga watan Febrairu, shekara ta 2022.

***

 Jamila wata mata da ba za ta wuce shekaru Ashirin da takwas zuwa talatin ba, tana tafe riƙe da yara biyu a hannunta, ɗaya kuma goye a bayanta, wanda wannan yasa suka zama yara uku kenan.

Yaran na riƙe a hannunta babban zai kai shekaru biyar, mai bi mashi kuma Shekaru huɗu, yayin da wanda take goye dashi zai kai shekaru biyu.

A Siffa ta jiki ba za a kira Jamila da mabaraciya ba, sakamakon babu alama ko ɗaya a jikinta da zata nuna tana cikin wani hali, na neman taimako amma kuma taimakon take nema.

Gidan mai ta nufa da yaran sakamakon hango cunkoson jama'a ta san ko babu komai zata iya samun sadaka a can.

Daidai fakawar Fahad a wajen da motar shi 206 Baƙa. Ya bi layin jama'a shima domin ya sha mai. Ya sauko da gilashin motar ne daidai saitin da yake domin kallon jama'a kafin layi yazo kansa.

Ya hango Jamila macen da bai kamata ace tana a rana irin haka tana bara, abun mamaki ya kama shi, ba ta yi kama da mai bara ba. Ya nutsa da mamakin dalilin da yasa take bara sai gashi ta tunƙaro inda yake.

Yaron da shekarun shi basu wuce biyar ba ya fara magana;

"Alhaji Allah ya tsare,

A taimaka mana da sadaka mu 'yan Gudun Hijira ne"

Da alama waɗannan kalmomi yaron ya haddace su sosai a kan shi, sakamakon maimaita su da yake ta yi.

Fahad ya kira uwar da hannu.

Ta matso sosai kamar zata buɗe motar ta shiga, sannan ya ce;

"Zaki iya aikin Abincin sayarwa ana biyanki?"

Jamila ta amsa da sauri ta ce,

"Alhaji Me zai hana? Wanda ya faɗa ruwa ai ko takobi ka bashi kamawa zai yi, wannan barar da nake gararambar yi da yara a titi ai ba don ina so nake yi ba, In san samu ne ace ina gida ina sana'a su kuma suna makaranta, ɓarayi sun kashe mani mahaifinsu, ni kuma sun sa mun gudu mun baro muhallinmu, barar ce abu na ƙarshe da zan yi in ciyar da yaran nan".

Ta duƙar da kai ƙasa sai hawaye.

Fahad ya kai Jamila gidan wata yayarsa mai sayar da abinci da ya ji tana neman 'yar aiki, aka kuma yi sa'a ta ɗauke ta.

Da yake Jamila mai ƙoƙari da ƙwazo ce da abincin da take samu take ciyar da yaranta, kuɗin da ake bata dasu ta saka yaranta biyu Islamiyar Unguwar da ake biyan kuɗin sati. Da makarantar Gwamnati ta boko.

Daga nan rayuwar Jamila da yaranta ta gyaru, cikin ƙanƙanin lokaci ta goge, a gidan matar nan da suke sana'ar abinci ta samu miji, wani mai rufin asiri ya aure ta, bayan bincike da ya yi a kanta da kuma tausayi da take bashi, ya ɗauki nauyin karatun yaranta su uku.

Ba zamu iya kawar da bara ba, duk yadda muke tunani, amma zamu iya ba mabarata gudummuwa ta hanyar gyara rayuwarsu, kamar yadda Fahad ya yi.

Zagi, tsinuwa ko ƙananan maganganu kan mabarata Mata da Maza ba zai zama mafita ba, wasun sau da yawa in zaka ji sanadin bararsu dole ka tsaya ka kai masu ɗauki.

***