Yan Adaidaita Sun janye Yajin Aiki A Kano

 Daga: Muhammad Abdallah

11 Janairu, 2022

KANO, NIJERIYA - Ƙungiyar masu Adaidaita sun janye yajin aiki a Jihar Kano, Barrista Abba Hikima wato lauyan da ke kare ƙungiyar shi ya sanarwa da matakin da ƙungiyar ta ɗauka na janye yajin aikin.

Tun a ranar Litinin, 10 ga watan Janairun 2022 aka wayi gari da yajin aikin direbobin Adaidaita.

Masu adaidaita na zargin cewa ana karɓar masu kuɗi da sunan rigistar lambar motarsu wanda wannan ne yasa suka tsunduma yajin aikin. Haka kuma ana sanya masu haraji mai yawa inda suke biyan naira ɗari duk kullum kuma daga bisani aka maida harajin naira ɗari da ashiri duk kullum.

 Duk da kiraye-kirayen da suke yi na gwamnati ta rage masu biyan harajin ranakun Lahadi tun da jami'an hukumar Karota ba sa fita aiki a ranar amma kiraye-kirayen ya ci tura.

A ɗayan hannun, gwamnatin Kano na ganin kyautatawar da take yi wa masu adaidaita, haka kuma, basu ganin irin karamcin da ake yi masu wajen rage masu karɓar haraji.

Yajin aikin dai ya ja tsallawar ababen hawa da taƙaitarsu a faɗin birnin Kano.

Wasu Labarai:

1. Wani Matashi Kashe Wata Yarinya bayan ya yi garkuwa da ita
   
2. An Kaddamar da Kungiyar Neman Zaben Mustapha Inuwa A Danja
   
3. Yan Bindiga Sun Sace Mahaifiyar Danmajalisa a Kano