Wani Ɗalibi Ya Kusa Yi Wa Jiniyansa Yankan Rago A Makarantar Kwana Dake Borno

 Daga: Muhammad Abdallah

ABUJA, NAJERIYA - Wani ɗalibi da hukumar makaranta ke neman ɓoye sunansa ya yanka Jibril Sadi Mato da reza a maƙogoro lamarin da yasa aka kai Jibril asibiti tare da yi masa tiyata a wuya. Dukkan ɗaliban guda biyu sun fito daga makarantar Elkanemi College of Theology take Jihar Borno.

Ɗalibin dai yana gaba da su Jibril, inda ake tsammani ɗan aji biyar ne, ya aiki Jibril wanda ake wa laƙani da Ramadan, amma sai Ramadan bai yi aikin da ɗalibin ya sanya shi ba, wanda yasa ɗalibin ya yi fushi sannan ya yanki Ramadan da reza a maƙogoro.

Yan’uwan Ramadan ne suka kai ƙorafin faruwar al’amarin a caji ofis. Ƴan uwan suna zargin wani Ɗalibi da ke ajin gaba da na Jibril ne ya raunata shi a wuya ta hanyar yankansa da reza har sai dai ya yi illa ga maƙogwaronsa.

Yar’uwar Ramadan ta ce,

"Ramadan an yanke shi ne a wuya, wanda hakan ya haifar masa da raununka masu tsanani, a halin da ake ciki yana kwance a asibiti rai hannun Allah. Kuma ko ya tashi daga jinyar ba lallai ya sake ci gaba da iya magana ba”.

Ta ƙara da cewa,

"Wanda ya yanka shi shima yaro ne ɗan makarantarsu saidai kuma ana so a ɓoye abin, don ita kanta hukumar makaranta ba ta sanar da faruwar lamarin ba”.

Ta kuma ce,

"Muna so gwamnati ta yi bincike ta gano ainhin abin da ya faru sannan a gurfanar da mai laifin a kuma yi masa hukunci,"

 

Yaron da dangin Ramadan ke zargi da yanka shi, wani ɗan gata ne da ya fito daga gidan masu hannu da shuni, ƙila wannan ne ya sa shugabannin makarantar suke ta rufe maganar. Wata majiyar ta ce, shugabannin makarantar sun fara sauya maganar, suna cewa wai rauni kawai Ramadan ya ji, ba wani ne ya yanka shi ba.

Ba wannan ne karon farko da ake samun irin wannan cin-zali ko fin ƙarfi da manyan ɗalibai suke nuna wa ƙanana a makarantar ba, kuma sau da yawa ba a ɗaukar mataki na kaiwa ga hukuma.

 Wasu Labarai:

1. Mayaƙan ISWAP sun sace yara mata da maza 20 a Jihar Borno
   
2. Buhari Ya Miƙa Ta'aziyyarsa Ga Iyayen Hanifa Da Aka Kashe A Kano
   
3. Wata Mata ta Kashe kanta a Kano