Sarkin Dawa

Shaharar Yaro Cinye-gari A Bikin Budar daji

Daga: Littafin Hikimarka Jarinka na Bello Hamisu Ida

Zamanin wani sarki na haɓe, kafin zuwan Musulumci ƙasar Hausa, a kusa da binnin Katsina akwai wani ɗan ƙaramin ƙauye da Allah ya yi wa albarkar Jama’a mai suna Battagari. Mafi yawan mutanen garin Mafarauta ne da Bokaye da suke zuwa cin zango su wuce.

A wannan garin ne ake taruwa duk ƙarshen shekara bayan saukar ruwa ayi bikin Buɗar daji, watau a nemi albarkar wannan shekara da neman tsari daga cututuka a wajen ubangijin da mutanen suke bauta ma wa.

A cikin garin Battagari, akwai wani ƙaƙƙarfan mutum maji ƙarfi. An ce da kansa yake kashe giwa ya kawo namanta gida, sunansa Baka. Shaharar wannan mutumin ne ta sa mutanen garin suke biyayya a gare sa, har yake masu jagoranci a wajen bikin buɗar daji.

Mutanen garin Battagari suka rinƙa kiransa Sarkin Dawa. An ce babu wanda ya kai shi iya jan kwari da baka. Ya sha harbo idon zakanyar da take shayarwa daga nesa.                           

Allah ya albarkanci Sarkin Dawa da ‘ya’ya masu tarin yawa ‘ya’yansa tamanin da shidda, ga mata bila adadin matansa talatin da tara, ta ɓangaren dukiya kuwa ba a cewa komai.    Matarsa ta goma sha uku ɗiyar wani boka ce, wacce bokan ya aurar da ita ga Sarkin Dawa don ta gaje sarautar gidansa. Bayan shekara da auran Talle Ɗiyar boka, ta samu juna biyu ta haifi ɗa namiji, aka sanya masa suna Cinye-gari, watau ma’ana ya kwace garin Battagari daga hannun ubansa Sarkin Baka. Ranar suna Sarkin Dawa ya cire wata laya daga ƙugunsa ya ɗaura wa ɗansa layar a ƙugu.

Bayan yaro ya tasa ya kai shekara uku, rannan sai mahaifiyarsa ta kwanta barci. Talle ta yi mafarkin wasu mutane sun zo suna mata ishara da cewa,

“Ɗanki Cinye-gari ba zai mutu ba har sai lokacin da aka ƙone layar da ubansa ya ɗaura masa a ƙugu, in kuwa duniya ta ɗaukaka sai ya zama Sarkin duk Ƙasar Hausa.”

Talle ta ɗimauta da wannan mafarki, tana farkawa ta kwance layar dake ƙugun Cinye-gari ta ɓoye, watau ɗai ɗanta ba zai taɓa mutuwa ba tun da ta ɓoye laya.

Cinye-gari ya taso cikin sa’o’insa ƙaƙƙarfa, ba mai iya karawa da shi. Wasu lokutan har buge manyansa yake yi. Haka ya tashi cikin izgili da raina mutane, shi ga mai ƙarfi. Ita kuwa uwarsa sai ta zagi mutum idan ya taso ta haɗa shi da Cinye-gari, ta san shi ne mai duniya ba zai taɓa mutuwa ba. Cinye-gari yana da shekara bakwai aka tashi yin bikin Buɗar Daji.

Ranar buɗar daji ta zo, manyan mafarauta, bokaye da maharba suka taru bakin daji, makaɗa da mawaƙa da ‘yan goge suka yi ta kirari tare da zuga maza.

Da Rana ta yi sanyi Sarkin baka ya yi umurni aka shiga dajin farauta, nan kowa ya shiga nuna tasa bajintar. Karon farko Cinye-gari ya samu sa’ar kashe zaki, ba’a jima ba ya sake kashe kura, bai fito dajin ba sai da ya kashe barewa uku, karen daji da Zomaye, ya jawo su ya kawo bakin ɗaji.

Duk wanda ya kawo namansa babu wanda ya kaso abin da Cinye-gari ya kashe, aka shiga kuranta sa ana masa kirari, take mahaifinsa ya ba shi sarautar wazirinsa.

Baƙin ciki wajen danginsa ba a cewa komai, kishiyoyin uwarsa kuwa suka huro wuta, suka shiga bin bokaye, suna son kashe Cinye-gari don kar ya karɓe gida.                                      

Wata rana matar Sarkin Baka mai bi wa Talle ta laɓe bayan ɗakin Talle, ta ji tana ce wa Cinye-gari,

“Duk su yi iyakar tugunsu, ba za su taɓa gane makasarka ba, babu wanda ya san makasarka sai ni uwarka. Watau wannan Laya da ka ke gani ina ɓoyewa ita ce makasarka da zaran ta ci wuta, taka ta ƙare.”          

Cinye-gari ya tsorata sosai da jin wannan labari, take ya murɗe kan uwarsa ya ɗauke laya, ya kai bayan gari cikin wani kogon dutse ya bizne.

Duk abin nan da ke faruwa wannan mata tana biye da shi, bai sani ba. Yana barin wajen ta shammaci ido ta shiga kogon ta tone laya ta ɗauke ta.

Wasu Labarai

1. Labarin Jatau Mawaƙi
2. Labarin Akuya mai Magana
3. Labarin Ƙaiƙayi Koma Kan Masheƙiya
4. Labarin Na Shiga Ban Ɗauka Ba
5. Labarin Sarkin Dawa
6. Labarin Aikata Alheri Duk Inda Ka ke
7. Labarin Ka So Naka, Duniya Taƙi Sa
8. Labarin Ɓarawon Birni Da na Ƙauye

Shi kuwa Cinye-gari ya nufi turakar Ubansa don ya murɗe masa wuya ya ƙarbi Sarauta da ƙarfi, kafin ya isa wannan mata ta sanya wa layar wuta, yana daidai ƙofar turakar ubansa layar ta ƙarasa cinyewa da wuta, ubansa ya ji faɗuwar Cinye-gari, yana fitowa ya ci karo da gawarsa.

Ya yi godiya, daga nan Sarkin Baka ya yi ammana da tsarkin Allah, ya tabba ta ikon Mai duka ne kawai ya tseratar da shi daga sharrin boka uban Talle.

Daga nan ya kafa mulkin gaskiya a tsakanin iyalansa da al’umarsa baki ɗaya. Ya bar fifita wani kan ɗan’uwansa.