Na Shiga Ban ɗauka Ba

Labarin Danliti Sullutu

Daga: Littafin Hikimarka Jarinka na Bello Hamisu Ida

Sullutu shi ne sunan da aka fi saninsa da shi. Ana kiransa da wannan sunan don ya cika wauta, duk garin babu mai wautarsa.

Iyayensa babu abin da  ba su yi ba don dai ya rage wauta amma a banza wai man kare. Har makarantar allo an kai shi  garin Funtuwa wautarsa ta sa aka maido sa gida.

 Wata rana Sullutu yana barci cikin zauren gidansu ya kima babbar riga da zungureriyar hularsa, sanyin zaure ya daki jikinsa yana munshari yana shura ƙafa.

Ya saki wani murmushi a bayyane sannan ya juya kwanciyarsa gami da ƙara rumtse idanuwansa.

Ya yi rashin sa’a, wata Akuya da tawagarta ta shararo da gudu, wasu suka tunkari shimfiɗarsa wasu suka nufi cikin gida da gudu, babu shiri ya tashi da ga barcinsa. Ya saɓe babbar rigarsa zungureriyar hularsa na kallon soron gidansu, ya yi tagumi yana kallon Awakan suna shiga gida, duk zuciyarsa ta yi ƙunci.         

Abin da  ya faɗo masa a zuciya shi ne samɓaleliyar Budurwar da ya haɗu da ita a cikin mafarki. In zai iya tunawa ta ce masa tana zaune a birnin Zariya.

Baƙin ciki ya addabe sa, ya kulle kayansa sai birnin Zariya neman budurwarsa ta mafarki.

Ya kama hanya, tafe yake baki buɗe yana kallon manyan gine-gine da motoci, babura da kekuna har ya kawo ƙofar wani babban gida.

Ya nemi waje ya zauna, bakinsa buɗe yana kallon gidan, wata zungureriyar mota ta fito daga gidan, tayi gabas, bayan awa biyar motar ta dawo, har lokacin Sullutu na nan zaune yana hammar yunwa.

Motar ta tsaya, shi kuwa Sullutu sai kyarma ta gwace masa, Alhaji wanda aka fi sani da Mai Buhun Naira ya fito sannan ya kalli Sullutu tausayinsa ya kama shi, ga alama zai iya yin gadi.

Daga nan Mai Buhun Naira ya ɗauki Sullutu gadi, kullum yana bakin ƙofa yana shan inuwar silin. Ashe Sarkin gidan Mai Buhun Naira ya ji haushin zuwan Sullutu kuma yana da kulalliya cikin zuciyarsa.

Wata rana Mai Buhun Naira ya yi tafiya, sai Sarkin gida ya kira Sullutu ya bashi kayan wankin Mai Buhun Naira ya ce ya je ya kai su can cikin ɗakin Mai Buhun Naira.

Ɗakin ko matan Mai Buhun Naira basa shiga saboda duk wata dukiya tashi tana cikin wannan ɗakin. Sullutu ya ɗauki kaya ya shiga cikin gida.

Matan Mai Buhun Naira suka ji motsi, su duba sai ga mutum cikin ɗakin Mai Buhun Naira, suka yi ihu ɓarawo, aka kama Sullutu, nan da nan aka kira ‘yan doka aka ɗaure Sullutu sai ofishin ‘yan doka.

Mai Buhun Naira ya dawo aka bincika, ashe duk an wawushe ɗakin Mai Buhun Naira, an ɗauki maƙudan kuɗi. Aka tsananta bincike amma Sullutu bai fito da kuɗin da aka sata ba, ‘yan doka suka shiga jibgar Sullutu.

Da wahala ta tsananta ga sullutu sai wata dabara ta faɗo masa, ya shiga murɗe-murɗe yana gaza cikinsa na ciwo, ya faɗi ƙasa yana ihu har aka ji shi, aka garzayo aka ɗauke shi sai asibiti, daidai za a shiga mota da shi, sai ya sulalo ya faɗo ƙasa ya warware, ya ranta a na kare. ‘Yan doka suka rufa masa baya, abinka da baƙauye ya yi masu fintikau.

Ya rinƙa shiga lunguna, har Allah ya maido shi wajen da ya fara tsayawa, watau kusa da gidan Mai Buhun Naira, ya samu waje ya rakuɓe, can wata budurwa ta fito daga gidan Mai Buhun Naira, gaban Sullutu ya faɗi, ya tuna budurwarsa ta cikin mafarki, cikin sauri ya isa gabanta ya ɗuka har ƙasa.

Kallo ɗaya ta shaida Sullutu, shi ne wanda Sarkin gida ya ja wa sharrin Sata, budurwar ɗaya ce daga cikin masu yin wanke-wanke gidan Mai Buhun Naira, amma Sullutu bai santa ba.

Sullutu Ya roƙe ta ta ɓoye shi, ta ja shi zuwa wani gida, ya kwashe duk abin da  ya faru ya gaya mata. Ta ce masa Sarkin gida ne ya haɗa kai da wasu ɓarayi, bayan an kira ‘yan doka ɓarayin suka yi amfani da wannan damar suka shiga ɗakin Mai Buhun Naira suka wawushe dukiya.

Sullutu ya tambaye ta ko ta san inda zai ga ɓarayin? Ta ce masa a’a amma zata taimake shi su kama Sarkin Gida, ta bar Sullutu nan ta koma gidan Mai Buhun Naira, tana shiga Sarkin Gida ya ce ta kawo masa abinci, ita kuwa ta fakaici ido ta sanya masa banju cikin abinci, yana ci barci ya ɗebe sa, ta mirgina shi ta sanya cikin buhu, ta ciciɓe sa ta aza bisa baro ta tura sai gidan da Sullutu ya ke, suka ɗaure sa tamau.

Wasu Labarai

1. Labarin Jatau Mawaƙi
2. Labarin Akuya mai Magana
3. Labarin Ƙaiƙayi Koma Kan Masheƙiya
4. Labarin Na Shiga Ban Ɗauka Ba
5. Labarin Sarkin Dawa
6. Labarin Aikata Alheri Duk Inda Ka ke
7. Labarin Ka So Naka, Duniya Taƙi Sa
8. Labarin Ɓarawon Birni Da na Ƙauye

Bayan ya farfaɗo Sullutu ya shiga jibgarsa, ita kuwa Budurwa ta nufi caji Ofis. Sai ga ‘yan doka, aka kama Sarkin Gida da Sullutu sai ofis. Sarkin Gida ya ji matsa ya faɗi gaskiya, shi ne ya haɗa kai da ɓarayi aka sace dukiyar Mai Buhun Naira, aka kama ɓarayin ɗaya bayan ɗaya.

Aka gurfanar da su gaban kuliya. Alƙali ya yanke masu hukunci. Shi kuwa Sullutu ya kuɓuta. Har ya kama hanyar ƙauyensu, Mai Buhun Naira ya sa aka kira shi ya damƙa masa kyautar kuɗi masu ɗimbin yawa.

Sullutu ya koma gidan su wannan budurwa suka daidaita aka ɗaura masu aure, Mafarkinsa ya zama gaskiya.

Ya koma gida, ya ci gaba da noma, duk ƙauyen babu matashi mai kuɗinsa.