Jami’an Tsaro Sun Yi Arangama Da Ɓarayin Daji A Yankunan Zamfara

Daga: Muhammad Abdallah

ZAMFARA, NAJERIYA — Wasu mahara wanda ake tsammanin ɓarayin daji ne sun shiga wata unguwa da ake kira da Mareri dake birnin Gusau da daddare don su sace wani mutum, amma rundunar ‘yansandan Jihar sun yi ƙoƙari sosai wajen murƙushe wannan hari, inda suka yi bata-kashi tsakanin ‘yansandan da ɓarayin dajin, daga bisani ɓarayin suka ruga suka shiga daji. Bayan haka kuma sai jami’an suka yi masu kwantar bauna sannan suka samu damar amsar wasu da ɓarayin suka yi garkuwa da su kafin su shiga unguwar Mareri.

Kakakin rundunar 'yan sandan jihar Zamfara SP Muhammad Shehu ya shaida cewa an sanar masu da zuwan ɓarayin, sai suka aika da jami'ansu inda suka hana ɓarayin dajin tafiya da mutanen da suka sata.

Haka kuma, a yankin Bukuyum jami’an tsaro sun fatattaki wasu ɓarayin daji har suka samu damar kashe wasu ɓarayi da dama sannan suka kori wasu suka kuma kuɓutar da wasu mutane da aka yi garkuwa da su. Wani ganau ya shaida cewa, an yi musayar wuta sosai tsakanin ɓarayin dajin da jami’an tsaro wanda daga baya Allah ya ba jami’an tsaro nasarar fatattakar ɓarayin dajin. An yi wannan arangama ne a dajin Gando.

Wani ganau ya shaida cewa, ɓarayin sun koro mutane daga ƙauyukansu inda suka riƙa satar abinci da shanaye, amma daga baya sai jami’an tsaro suka zo sannan suka kori ɓarayin. An kashe wasu ɓarayin daji da dama a wannan fafatawa. Saidai babu wanda ya ji ciwo a ɓangaren jami’an tsaro.

Ɓarayin daji dai na ƙara kai hare-hare a ciki da wajen jihar Zamfara, duk da kiraye-kirayen da wasu shuwagabannin ɓarayin suke yi na neman sasanci, ko a watannin da suka wuce saida Bello Turji ya saki mutanen da ya kama a ƙoƙarinsa na yin sasanci da gwamnati.

Kdoayake, jami’an tsaro na taka muhimmiyar rawa wajen daƙile duk wani hari da ɓarayin dajin za su kai ko suka kai. Ko baya, bayan nan saida Shugaba Muhammadu Buhari ya ƙaddamar da rundunar hari ta fatattakar ɓarayin daji a wani yunƙuri na samar da zaman lafiya a jihar Neja, inda ke samun hare-haren ɓarayin daji masu satar mutane don karɓar kuɗin fansa. 

Garuruwan Katsina da Kaduna da Zamfara da Sokoto da Kebbi da Nija na daga cikin garuruwan da suka fi samun tashe-tashen hankulla inda ɓarayi daji ke kai hare-hare tare da satar mutane don karɓar kuɗin fansa. 

Wasu Labarai:

1. Wani Bawan Allah Ya Ƙuduri Aniyar Ba Mahaifan Hanifa Kyautar Ɗiyarsa
   
2. Buhari ya tattauna da Ƴan Wasan Super Eagles ta bidiyo
   
3. Wani Ɗalibi Ya Kusa Yi Wa Jiniyansa Yankan Rago A Makarantar Kwana Dake Borno