Buhari Ya Nemi Mutanen Zamfara Su Ƙara Haƙuri

 #Arewanews

Daga: Muhammad Abdallah

09 Janairu, 2022

ZAMFARA, NIJERIYA - Shugaban Nijeriya Muhammadu Buhari ya nemi mutanen Zamfara su ƙara haƙuri, shugaban ya tabbatar da cewa za su gano waɗanda suke aikata wannan mummunan aiki sannan su ɗaukar mataki mai tsauri a kansu. Mutanen Zamfara da Sokoto da Kebbi da Katsina da Kaduna na fama da hare-haren ɓarayin daji masu satar mutane don karɓar kuɗin fansa. Ko satin da ya gabata sai da ɓarayin suka kashe mutane fiye da talatin da bakwai a ƙauyukan dake cikin Jihar.

A wata sanarwa da mai magana da yawun Shugaban Ƙasar Nijeriya wato Malam Garba Shehu ya fitar, Shugaba Buhari ya nuna ɓacin ransa matuƙa a kan rahoton da ya samu kan kisan gillan da aka yi inda ya ce shire-shire ne yasa ɓarayin dajin suke yin yadda suka so.

Shugaba Buharin ya sake tabbatar da cewa ɓarayin na gab da zama tarihi a Nijeriya inda ya ce ba za su yi ƙasa a gwiwa ba a yaƙin da suke yi da waɗannan mutanen da suke kashe mutanen da ba su ji ba su gani ba.

Wasu ƙauyuka da ke cikin Jihar Zamfara waɗanda suke Ƙananan Hukumomin Anka da Bukuyyum da ke Jihar sun binne mutum 143 waɗanda ɓarayin daji suka kashe a hare-haren da suka kai cikin kwanaki biyu.

Wasu Rahotanni

1. Wa Ya Ci Amanar Wani: Gwamna Masari Ko Sanata Babba Kaita?
2. Ɓarayi sun sace tsohon jami'in kwastam a Nijeriya
   
3. Fashewar Nakiya Ta Kashe Sojojin Ƙasar Nijar Huɗu
   

Kodayake, Gwamnan Jihar wato Gwamna Bello Matawalle ya ce, mutum 36 aka kashe a Ƙaramar Hukumar Bukkuyum amma zai ziyarci sauran garuruwan don ya tabbatar da cewa ko iƙirarin da ake yi na kashe sama da mutum 200 gaskiya ne.