Bello Turji Bai Mutu Ba Ya Kuma Sako Mutanen Da Ya Sace Don Karɓar Kuɗin Fansa

Daga: Muhammad Abdallah

4 Janauiru, 2022

ZAMFARA, NIJERIYA — Bello Turji shahararren ɓarawo da ya addabi garuruwan Sokoto da Katsina da Zamfara ya saki wasu mutane da suka daɗe a hannunsa waɗanda ya sace don karɓar kudin fansa.  Ɗan fashin dajin ya shahara ne sosai a garuruwan dake cikin Jihar Zamfara da Sokoto wanda ya riƙa sanya haraji a wasu ƙauyuka da ke kusa da dabarsa.

A wani rahoto da aka samu a Jaridar Dailay Trust, ɓarawon  ya sako mutanen ne ba tare da karɓar ko sisi ba, bisa wani ƙuduri nashi na son kawo karshen tashe-tashen hankulla da kuma samar da zaman lafiya a garuruwan Zamfara da Sokoto.

Bello Turji ya sako mutane sannan ya ajiye su a kusa da ƙauyen Mabera ƙauyen da bai wuce kilomita hudu zuwa Shinkafi ba, da misalin ƙarfe biyar na marece ne rundunar ‘yansandan dake garin Shinkafi suka je suka taho da waɗanda aka saki. Daga nan aka wuce da su Gusau. Wasu daga cikin ‘yanuwan  waɗanda aka saki har sun yi magana da ‘yan’uwansu da aka saka.

Waɗanda aka saki sun tabbatar da cewa, ba a ba Bello Turji ko sisi ba, ya sako su ne ba tare da ya karɓi kuɗin fansa ba. Haka kuma, sun tabbatar da cewa ya sako duk waɗanda ya kama don karɓar kuɗin fansa a ƙoƙarinsa na yin sasanci da hukuma.

A watan da ya gabata ne Bello Turji ya rubuta wasiƙa zuwa ga Masarautar Shinkafi da Gwamnan Jihar Zamfara da shugaban Ƙasar Nijeriya bisa ƙudurinsa ne neman afuwa da kuma kawo ƙarshen sace-sacen da yake yi, kodayake a cikin takardar ya yi iƙirarin cewa shi ne ake toƙala da faɗa kuma duk a cikin takardar ya buƙaci a sanya shahararren Malamin nan wato Sheikh Ahmed Gumi wajen yin sasancin, ya ce shi ne ya nemi a saka malamain domin ya sha zuwa wajensu kuma suna fahimtar koyarwarsa.

Haka kuma, a satin da ya gabata ne Jaridar PrNigeriya ta ruwaito cewa sojoji sun kashe wasu shahararrun ɓarayin daji, cikin waɗanda jaridar ta ambata harda sunan Turji, kodayake ba a tabbatar da cewa an ga gawarsa ba, saidai rahoton ya ce an kashe shi tare da yaransa lokacin da suka je wata zana’ida ta ɗaya daga cikin giggan ɓarayin.

Jim kaɗan bayan bayyanar rahoton, sai kuma Jaridar Katsina City News wadda ke yin haɗin guiwa da Jaridar Taskar Labarai wajen wallafa labarai ta ruwaito cewa, Rugga Kachalla yana nan da ransa. A cikin ruwayar Jaridar ta ce;  Ɗaya daga cikin ɓarayin da aka ruwaito jirgin sama ya kashe a harin da ya kai a yankin Zamfara wanda ya yi sanadin kisan Alhaji Auta wato Ruga kacalla, kamar yadda Jaridar Daily Trust ta ruwaito, Binciken da Jaridun Katsina City News ta yi a dajin Safana inda Ruga Kacalla ke da ƙarfi ya tabbatar mana Rugga Kacalla yana nan da ransa. Haka kuma, Alhaji Muhigge wanda shi ne babban yaron Alhaji Ɗan Auta a yankin Safana shi ma yana nan da ransa.

Garuruwan Katsina da Kaduna da Zamfara da Sokoto da Kebbi na fama da hare-haren ɓarayin daji masu satar mutane don karɓar kuɗin fansa.