Barawon Birni Da Na Ƙauye

Labarin Jikokin Sarkin Barayi

Daga: Littafin Hikimarka Jarinka na Bello Hamisu Ida

An yi wani Sarkin ɓarayi  ya sace ɗiyar wani attajiri, ya tafi da ita wani ƙauye kusa da birnin Katsina, aka ɗaura masu aure.

Allah ya azurta su da zuriya. Babbar ɗiyarsu Baraka ta yi gadon sata, ko ɓera albarka. Baraka ta auri wani Mai Kuɗi a birnin Kano, aka kai amarya ɗakin miji, shekara na zagayowa ta haifi ‘yan-tagwaye aka sanya wa ‘ya’yan Ɗan Hanne da Ɗan Baraka.

Lokacin da suka cika shekara uku, Sarkin Ɓarayi ya zo ya ɗauki Ɗan Hanne ya tafi da shi ƙauye ya koyi sana’a.

Shi kuwa Ɗan Baraka ya girma wajen mahaifiyarsa, Ɗan Hanne ya tashi wajen kakansa.

Bayan sheka Goma sha biyar, wata rana talauci ya ishi Sarkin ɓarayi gashi ƙarfinsa ya ƙare, sai ya ce bari ya jaraba jikansa ko zai iya gadonsa? Tunda yanzu ya kawo ƙarfi.

Sai ya kira Ɗan Hanne ya aike shi birni ya zambaci wani ɗan birni. Da Ɗan Hanne ya tashi tafiya sai ya nufi bakin rafi ya samu takardu ya yi masu linkin kuɗi sannan ya jera su cikin wani ƙaramin akwati ya rufe, ya nufi birni.

Ashe itama Baraka ta aiki Ɗan Baraka ƙauye don ya zambaci wani baƙauye. Ɗan Baraka kuwa da ya tashi tafiya sai ya samu tsumokarai ya zuba ya ɗaure cikin wani bargo, ya ɗaure kamar dila, ya ɗauki dila ya nufi ƙauye da nufin ya yaudari wani ya sayar masa da dilar da kuɗi masu tsoka.

Bisa hanya suka yi kiciɓis da juna! Ɗan Baraka ya yi wa Ɗan Hanne sallama, ya ce,

“Malam dila ce ta sayarwa in kana bukata.”

‘Banza ta faɗi’ Ɗan Hanne ya ayyana a zuciyarsa, ya ce a bayyane, “Eh, dama dila za je birni saye.”

            “Nawa?” Ya tambaya.

            “Fam hamsin da sule goma.” Ɗan Baraka ya sa suna.

            ‘In ka sallama fam talatin sai in ba ka jakar kudina, in ka je gida ka lissafa, ni sauri nake yi”. Ɗan Hanne ya taya.

Ta faɗi gasassa, ya yi saurin amincewa, ya karɓi jaka, ya miƙa masa ɗila, cikin sauri kamar mara sa gaskiya, kowa ya kama hanyar komawa gida murna cike da zuciya.

Ɗan Hanne na isa gida, ya buɗe dila, sai ya ci karo da tsummokarai yayin da shi kuwa Ɗan Baraka ya kasa haƙuri, tun a hanya ya buɗe jaka ya ga tulin takardu, cikin fushi ya ce,        

“Ni wannan ɗan ƙauyen zai zambata? Sai na koyar da shi darasi.”

Cikin fushi ya juya ya kama hanya, suka sake haɗuwa, suka ci kwalar juna, suna cikin faɗa sai ga wasu fatake sun koro raƙuma ɗauke da dukiya, irin su azurfa, zinare, alkyabba, kwanukan farin ƙarfe da kayan alatu, sun nufi hanyar shiga birni.

Mazanbatan suka ga faɗa ba nasu ba ne, tunda duk sun fahimci sana’arsu ɗaya, watau sata, me zai hana su haɗa kai su jaraba sa’a wajen waɗannan fataken?

Suka amince da wannan shawara su kuwa waɗannan fatake daga Sudan suke, sun sawo kayan adon Sarakai don su sayar a birni.

Da dare ya tsala ɓarayin biyu suka yi shigar fataken buzaye suka sauka wajen da fataken Sudan suke, kun san buzu da shan shayi, buzaye suka aza tukunyar shayi, suka zuba cikin ƙananan kofuka suka bi fataken suna ba su  suna cewa,      

“Yan uwa Musulmi ku sha ku sha shayi, karɓar kyauta tana ƙara imani.”

Su kuwa fatake suka rinƙa karɓar shayin suna sha, ashe a ɓoye ɓarayin sun sanya banju cikin shayi. Duk wanda ya sha sai ya ɓingire barci ya ɗebe su.

Da ɗai-ɗaya duk suka yi barci, su kuwa ɓarayi sai suka cire kayan buzaye suka shiga washe fatake, sai da suka yi masu kaf!

Sannan suka kwashe duk kayan da suka sata suka zuba cikin wata tsohuwar rijiya dake nesa kaɗan da kasuwa da nufin sai ƙura ta lafa su kwashe dukiyar.

Gari na wayewa fatake suka tashi suka ga an washe su kaf! suka kai ƙara wajen sarkin kasuwa, aka baza ‘yan doka suka yi ta bincike har tsawon mako biyu ba a ji duriyar ɓarayin ba.

Kasuwa ta uku ta zagayo fatake suka  koma inda suka fito. Bayan kasuwa ta huɗu ta ci, da tsakar dare ɓarayi suka shirya suka tafi bakin tsohuwar rijiyar da suka aje dukiya.

Gardama da kaure tsakanin ɓarayi, wa zai shiga ya ɗebo dukiyar? Kowa na tsoro kada ɗaya ya ƙulla masa wani tugu in ya shiga cikin rijiya, Saboda kowa neman sa’ar ɗaya yake ya kai shi ƙiyama don ya gaje dukiyar shi kaɗai.

Daga ƙarshe aka sa wa ɓarawon ƙauye igiya ya shiga cikin tsohuwar rijiya, shi kuwa ɓarawon birni ya zura babban masaki, ɓarawon ƙauye ya rinƙa zuba dukiya cikin masakin shi kuwa ɓarawon birni yana jawowa yana fiddo ta waje.

Wasu Labarai

1. Labarin Jatau Mawaƙi
2. Labarin Akuya mai Magana
3. Labarin Ƙaiƙayi Koma Kan Masheƙiya
4. Labarin Na Shiga Ban Ɗauka Ba
5. Labarin Sarkin Dawa
6. Labarin Aikata Alheri Duk Inda Ka ke
7. Labarin Ka So Naka, Duniya Taƙi Sa
8. Labarin Ɓarawon Birni Da na Ƙauye

 Duk lokacin da ya fiddo masakin danƙare da dukiya sai ya kai ta can nesa da su cikin wani kango ya zuba cikin akwatuna, niyarsa da dukiyar ta ƙare ya samu wani wargajejen dutse ya jefa cikin rijiyar, ɓarawon ƙauye ya mutu shi kuwa ya ɗauki dukiya shi kaɗai, duk lokacin da ya jawo masakin sai ya tambayi ɓarawon ƙauye ya ce, “Abokina akwai sauran dukiyar kuwa?”

Ɓarawon ƙauye ya ce, “Ta kusa ƙarewa.” Saboda yana sane da tugunsa, da ya tabbata dukiyar ta ƙare sai ya ce, “Wacce zan ɗauro ita ce ta ƙarshe, tana da nauyi, sai ka yi a hankali.”

Cikin farin ciki ya ce, “Yi maza ka ɗauro ta duka, zan iya jawo ta.”

Yana zura masaki sai ɓarawon ƙauye ya samu wani bargo ya lulluɓe duk jikinsa ya shige cikin masaki. Ɓarawon birni ya jawo masaki ya kai ma’ajiya ya aje duk da masaki, ya dawo bakin rijiyar ya mirgina wani murgujejen dutsi cikin rijiya, ya tabbatar da ya mutu, sai ya yi hamdala dukiya ta zama tasa shi kaɗai.

Shi kuwa ɓarawon ƙauye ko da aka ajiye shi, sai ya fito ya jiɗe duk akwatunan, ya kamo wasu jakuna da suke kiwo, ya ɗora masu akwatuna ya kora suka shige daji.

Ɓarawon birni na zuwa cikin kango sai ya ga wayam! Ya tabbata ɓarawon ƙauye ne amma duk inda ɗan ƙauye yake ba ka raba shi da jaki wajen ɗaukar kaya, cikin sauri sai ya shiga daji yana kukan jaki,

“Um! Umm! Ummm!.”

Shi kuwa ɓarawon ƙauye da ma bai yi nisa ba, da ya ji kukan jaki sai ya ce, “yauwa! Ga wani jaki can ya gudo bari in tara ko na ƙara samun mataimaki.”

A tara! a tara! Sai suka haɗe kowa ya yi cirko-cirko, suka yi wa juna zuru! Ɓarawon birni ya ci kwalar ɓarawon ƙauye ya ce, “Baƙauyen banza, ni za ka zamba ta?”

Ɓarawon ƙauye bai yi wata-wata ba ya yayibi kafafuwan ɓarawon birni ya yi sama da su ya wurgar! Ji kake ricaa! Nan kokowa ta kaure suka shiga jibgar juna.

Gab da Asubahi, yan-doka sun fito, suka yi ram! Da ɓarayin biyu. Da bincike ya tsananta aka gane ashe ma Ɗan Hanne da Ɗan Baraka ne ɓarayin, kayan da suka sata kuwa na fatake ne, aka nemo su har garuruwansu aka damƙa masu dukiyarsu. Ɓarayin kuwa aka kai su gidan yari.