An Binne Mutane 143 da Yanbindiga Suka Kashe a Zamfara

08 Janairu, 2022

Daga: Muhammad Abdallah

ZAMFARA, NIJERIYA - An binne gawarwakin mutume 143 waɗanda ɓarayin daji suka kashe, an kashe mutanen ne a wani hari da ƴan bindiga suka kai a ranar Laraba da kuma ranar Alhamis a ƙauyuka dake ƙarƙashin Ƙananan Hukumomin Anka da Bukuyyum da ke Jihar Zamfara. Bayan waɗannan gawarwaki, akwai wasu da ɓarayin suka kashe suka kuma daddatsa gangar jikinsu sannan kuma suka ƙona gawarwakin wasu ƙurmus.

Wani ganau ya shaida cewa akwai abubuwan ban tsoro da tashin hankali da ɓarayin suka aikata, bayan sun kashe mutane, sun kuma cinna wa wasu gidaje wuta inda wasu iyalai ke ciki, iyalan mata da yara da magidanta duk sun ƙone kurmus.

Rundunar sojojin Nijeriya ta tura jirgin yaƙi domin fatattakar ɓarayin dajin amma jirgin bai taɓuka komai ba, saboda ɓarayin sun yi dubara sun shige sun ɓoye cikin mutanen gari.  Ɓarayin bindiga dai suna ƙara matsawa cikin dazuzzuka saboda matsawa da sojoji suke masu, haka kuma suna faɗaɗa hare-harensu duk a yake dai wasu daga cikin sanannun ɓarayin suna ta ƙoƙarin ayi masu sasanci.

Ko satin daya gabata, wannan shahararren ɓarawon wanda aka fi sani da sunan Bello Turji ya sako duk mutanen da ya sace don karɓar kuɗin fansa. A niyarsa ta yin sasanci da gwamnati. Ƙauyuka da garuruwa da dama a Jihar Zamfara na fuskantar barazana da hare-hare daga ƴan bindiga. Gwamnati ta bayyana cewa an tura jami'an tsaro domin yaƙar waɗannan ɓarayin dajin.

1. Gobara ta laƙume kasuwar Nguru a Jihar Yobe
2. Sheikh Ahmad BUK Ya Rasuwa
3. Gawar Fir’auna Amenhotep

Garuruwan Katsina da Kaduna da Zamfara da Sokoto da Kebbi na fama da hare-haren ɓarayi masu satar mutane don karɓar kuɗin fansa, kodayake Sojojin ƙasar na bakin ƙoƙarinsu wajen daƙile hare-haren ɓarayin.