Labarin Dattijo, Saurayi Da Budurwa

Can wani zamani da ya gaba ta, Kasuwar Katsina ita ce babbar kasuwa a duk faɗin Ƙasar Hausa. Mutane daga ƙasashe daban-daban suna zuwa cin kasuwa.

 An yi wani Dattijo mai tarin dukiya ga tausayin mutane da taimakon talakawa, kullum za a iske shi zaune bisa kujera a zauren gidansa, tare da wani bawansa ya zauna ƙasa suna fira. Har ƙasashen Larabawa yake zuwa yin fatauci irinsu Saudiya da Sudan, duk kuwa lokacin da ya yi aniyar fita fatauci ayari da dama kan bisa su damƙa masa amanar dukiyarsu saboda riƙon amanarsa. Babbar ɗabi’arsa ita ce, son dabbobi, duk inda za shi dabbobi ne abokan rakiyarsa, duk kuwa abin da  ya ci sai ya ba dabbobinsa irinsa. Akwai wata barewa da yake tsananin so a cikin dabbobinsa.

 Wata rana Dattijo ya shirya ya yi aniyar tafiya Sudan yin fatauci, ya shirya raƙumansa da alfadarai, ya ɗora masu kaya niƙi-niƙi, ya gama shiri ya hau wata amintacciyar goɗiyarsa. Bayan La’asar ya fita ta ƙofar Sauri don neman sa’a. Bakin ƙofa ya haɗu da wani Saurayi haye bisa dokinsa danda riƙe da keji guda biyu, ɗaya ɓera ke cikinsa ɗaya kuwa mage ce cikinsa.

 Su ka yi gaisuwa sannan suka yi gaba, suka sake haɗuwa da wata Budurwa, tana sanye da wani farin mayafi, ta yi masu sallama sannan ta tambayi shugaban ayari, Dattijon ya karɓe ta cikin aminci, suka yi gaba tare.

 Suna cikin tafiya sun keta sahara ta farko, sun shiga wata sarƙaƙiyar daji, suka samu waje suka yada zango ƙarƙashin wata itaciya. Madugu ya fiddo gurasa da zumuwa suka ci su ka yi ibadarsu sannan suka sake nausawa cikin daji suna ta addu’o’i. Suna cikin tafiya ‘yan fashi suka tare su, suna riƙe da muggan makamai sai mazurai suke yi, aka ja Datijjo, da saurayi da budurwa zuwa gaban sarkin ɓarayin, aka ɗaure su sannan aka duƙar da su gaban sarkin ɓarayi.

 Ya harare su ya ce masu; “Ku ne ku ka sace mani dukiya?”

Dattijo ya ce, “Ba mu yashe maka dukiya ba.”

Sarkin Ɓarayi ya ce, “Ta cikin saharar da ku ka biyo na aje dukiyata, in kuwa ba ku fiddo ta ba sai na fille maku kawuna, ke kuwa ki zama matar Sarkin Ɓarayi”

Sarkin ɓarayi ya kalli Dattijo  ya ce, “Za ka iya ceton ranka da hikaya?”

 Dattijo ya yi nutso cikin tunani sannan ya fara ba da labari da cewa.[1]

Tambayoyi:

1.    A wancan zamanin, wace kasuwa ce babbar kasuwa a ƙasar Hausa?

2.    Wane dalili yasa kasuwar garin Katsina ta zama babbar kasuwa?

3.    Lisaffa ƙabilun da ke zuwa cin kasuwa a ƙasar Katsina?

4.    Yi taƙaitaccen jawabi kan halayyar wannan dattijo?

5.    Cike waɗannan guraben:

 

6.    Bayan la’asar ya fita ta _____________ don neman sa’a.

7.    Saurayi haye bisa _______ riƙe da _________________.

8.    ___________ ya fiddo __________ da zumuwa suka ci.

9.    Suna cikin tafiya sun keta ________ ta farko.

10.                       Ya harare su ya ce masu; “________________________?”

---

1. An ciro wannan labari mai suna ‘Labarin Dattijo, Saurayi da Budurwa’ daga littafin ‘Hikimarka Jarinka’ Littafi na Biyu wanda Bello Hamisu Ida ya rubuta