Habiba Mu’azu Ummin Baba Na Farin Cikin Zagayowar Wannan Rana Mai Albarka

 10 Oktoba, 2021

 

ABUJA, NIJERIYA — Wani abin alfahari ne mahaifa su tarbiyatar da ɗa ko ɗiyarsu wanda za su zama sadaƙa gare su da al’umma da addini. Kodayake, bikukuwa sun zama wani abin alfahari da birgewar da nishaɗi, amma ga Habiba abin ba haka yake ba.

Duk da yake bikin zagayowar Haihuwa ya zama wani abin al’ada a yanzu, amma Ummin babba bikin zagayowar cikar shekarunta ya zamar mata wata rana ta tunawa da mahaifinta tare da yi masa addu’o’in samun rahma.

Haka kuma, ranar ta zama ranar tunawa da ‘yanuwanta da take ƙauna waɗanda suka zamar mata bangon data jingina da su.

Habiba yarinya ce mai tarbiya da girmama na gaba, da biyayya da hangen nesa, da hankali da son nishaɗi, da fara’a da son mutane. Tsohuwar ɗaliba ce a Makarantar Jeka ka dawo dake Barikin Sojoji ta Katsina da aka fi sani da Natsinta, kuma ita ce shugabar ɗalibai ta mata waɗanda suka kamala a shekarar 2020.

Hazaƙarta da maida hankali wajen karatu yasa ta samu wannan muƙami, bayan wannan kuma tasha samun wasu muƙamai a ciki da wajen makaranta. Ta taɓa shiga gasar Hikayata ta mata wadda BBC Hausa ke shiryawa duk shekara a shekarar 2021. Bayan wannan gasa tasha shiga gasa don nuna fikirarta da hikimarta da zurfin tunaninta wajen hanken nesa.

Haziƙar, Habiba tafi so a kira ta da sunanan ‘Ummin Baba’ don nuna soyuwarta ga zuri’arta. Tana tsananin kulawa da ƙawarta mai suna Ruƙayya wadda ta zama aminiyarta kuma yar’uwa. Ƙawayenta kuwa su ne, Salma da Rahma da Amira da Humaira da wasu da dama.

Ta kan yi alhinin ranar da ta rasa mahaifinta, (Allah ya jikansa da rahma). Haka kuma tana yawan farin ciki a duk lokacin da ‘yanuwanta ke cikin farin ciki suna tayata murna.

Tana son cin abincin gargajiya, tana son saka suturar gargajiya, haka kuma tana son duk kyautar da aka yi mata wacce zata sanyata farin ciki.

A wannan rana mai albarka, daidai wannan lokaci mai cike da farin ciki, Habiba wato Ummin Baba tana cikin farin ciki tare da yan’uwanta da abokanta da zuri’arta da sauran al’umma. Tana farin cikin zagayowar ranar haihuwarta tare da sauran al’umma baki ɗaya.

Arewa News na taya Habiba Ummin Baba farin ciki a wannan rana mai cike da albarka.